Pasojat që lanë dy tërmetet e vjeshtës së vitit të kaluar, por edhe situata me sektorin e ndërtimit në tërësi dhe shkeljet ligjore që herë pas herë janë pikasur, kanë detyruar qeverinë që të propozojë ndryshime në Kodin Penal, ku të ashpërsohen dënimet për rastet e abuzimeve në këtë sektor.
Në një projektligj të depozituar në Kuvend, qeveria propozon dënime nga 5 deri në 15 vite burg për të gjitha rastet kur abuzohet me cilësinë e ndërtimeve apo edhe në rastet kur dëmtohen strukturat mbajtëse të godinave.
Sipas hartuese të këtij projektligji, amendimet e propozuara në Kodin Penal synojnë rritjen e përgjegjshmërisë dhe të përgjegjësive të subjekteve ndërtuese në të ardhmen, me qëllim ushtrimin e veprimtarisë së tyre, duke zbatuar rigorozisht kërkesat, kushtet dhe kriteret ligjore dhe teknike në fushën e ndërtimit.
“Objektivat kryesorë të këtij projektligji konsistojnë në: përcaktimin e përgjegjësisë penale të subjekteve që janë të përfshira në procesin e ndërtimit të objekteve, që kanë vepruar në mënyrë abuzive dhe në kundërshtim me rregullat teknike dhe përcaktimet ligjore në fuqi; parandalimin dhe përcaktimin e përgjegjësisë penale ndaj veprimeve apo mosveprimeve të kundërligjshme kundër objekteve, që kryhen me qëllim rrëzimin e plotë ose të pjesshëm të tyre, duke cenuar të drejtën e pronës, vënien në rrezik të jetës apo shëndetit të personave e të tjerë. Nëpërmjet këtij projektligji synohet të përcaktohen sanksione penale kundrejt subjekteve që në veprimtarinë e tyre nuk kanë përmbushur apo kanë shmangur me dashje detyrimet ligjore të përcaktuara në akte të posaçme që i përkasin fushës së ndërtimeve private dhe publike”, thuhet në relacionin që shoqëron projektligjin e depozituar në Kuvend.
Në nenin 1 të projektligjit që shton nenin 154/a në Kodin Penal parashikohen dënime nga 5 deri në 15 vite burgim për rastet kur ndërhyhet në strukturat mbajtëse të godinave dhe kur pasojat nga shembjet janë të rënda.
Ndërsa në nenin 3 të ligjit që parashikon shtimin e nenit 199/c në Kodin Penal, qeveria ka propozuar rregulla dhe ndëshkime më të ashpra për fazën e projektimit, mbikëqyrjes, zbatimit ose kolaudimit të ndërtimeve, në ato raste kur në këto faza konstatohet paligjshmëri, të cilat mund të çojnë në pasoja të rënda deri në humbjen e jetës së njerëzve.
