‘Betejë në emrin tim, në fund bëri pazar!’ Ndryshimet në Kodin Zgjedhor, Rudina Hajdari tejet e zhgënjyer nga Rama

21:12 05/10/20204min143
rudushi

Pak orë pas votimit në Kuvend të ndryshimeve në Kodin Zgjedhor, deputetja e opozitës parlamentare, Rudina Hajdari ka deklaruar në ‘ABC News’ se rezultati ishte një pazar i radhës i PS, ndërsa shtoi më tej se partitë politike premtojnë shumë gjëra dhe në fund gjithçka hidhet poshtë pas marrëveshjeve të fshehta.

“Rezistenca për të bllokuar foltoren ishte për të dhënë një mesazh të qartë. Ishte revolta e shumë qytetarëve që u zhgënjyen nga PS e cila propozoi një formulë për listat e hapura që nuk ishin ato që ishin premtuar por një marifet i radhës për të bërë pazar. Nuk besoj që ka shqiptar që nuk e ka marrë vesh që unë isha kundër që Kodi Zgjedhor të binte pre. Premtohen shumë gjëra dhe në sekondat e fundit bëhet një pazar. Në momentin që i bëj një premtim shqiptarëve dhe luftoj për një betejë kur edhe palët e tjera u bashkëngjitën në këtë qëndrim”, tha Hajdari.

Hajdari tha se ndihet e zhgënjyer për sa kohë listat e hapura ishin premtuar nga vetë Rama në Kuvend, por jo e përdorur, pasi sipas saj Rama ia ka hedhur shqiptarëve dhe jo asaj.

Ajo deklaroi se nuk pendohet për votën që dha për ndryshimet kushtetuese, duke e justifikuar atë në arritjen e votës parapëlqyese.

“Vetë Rama ka thënë me gojën e tij që listat do të hapen 100% dhe koha që kryetari të vendosë ka mbartur. Ka përmendur edhe emrin tim që e gjithë kjo betejë është nisur nga Rudina Hajdari. Jam e zemëruar nga mënyra se si kjo marrëveshje dhe ky kod zgjedhor u bë. Kur ne flisnin për listat e hapur dukeshim naivë. Votën në ndryshimet kushtetuese e kam dhënë për qytetarët shqiptarë. Sot PS na zhgënjeu si shumë të tjera. Sot qytetarët shqiptarët kanë mundësinë për të pasur një votë parapëlqyese. Atë të drejtën unë e kam votuar në Kuvendin e Shqipërisë me mundin dhe djersën time. Luftova për një betejë ideale. Për këtë jam e zemëruar sot. Në zgjedhjet e ardhshme qytetarët do shkojnë me një votë parapëlqyese. Nuk jam e kënaqur dhe do doja shumë më shumë se kaq. Nuk pendohem për një votë që dha mundësinë shqiptarëve për një votë preferenciale. Nuk ndihem sikur ma ka hedhur Edi Rama, ia ka hedhur shqiptarëve. Kjo luftë nuk bëhet për mua. bëhet për shqiptarët. Unë mendoj se ka shumë punë për të bërë dhe duhet të motivojmë qytetarët. Këta që ishin i kanë dhënë të gjitha. Edi Rama ia hodhi vetes së tij. Mashtrimet janë në kurrizin e tij”, u shpreh Hajdari.

Leave a Reply

Your email address will not be published. Required fields are marked *


Rreth Nesh

Pusullashqiptare.al vjen si një iniciativë gazetarësh të rinj që parim themelor kanë informimin e publikut në mënyrë të paanshme. Ne do të jemi gjithmonë të pavarur, të vërtetë, në krah të interesit publik.


Kontakto